Gianluca Esposito, sérfræðingur GRECO, samtaka ríkja gegn spillingu, segir að löggæsla á Íslandi sé berskjölduð fyrir pólitískum áhrifum. Esposito, sem kom hingað til lands í vettvangsferð, segir að GRECO hafi fundið fyrir því að rótgróin tengsl séu á milli lögreglunnar og „tiltekins stjórnmálaflokks“. Greint er frá úttekt GRECO og rætt við Esposito í Fréttablaðinu í dag.
„Tilfinningin er að það þyki jákvætt að vera virkur þátttakandi í þessum tiltekna flokki,“
segir Esposito og bætir við að það þyki gott fyrir frama innan lögreglunnar að vera meðlimur í „tilteknum stjórnmálaflokki“. Þar að auki hafi samtökin fengið dæmi um að íslenskur ráðherra hafi með beinum hætti haft afskipti af störfum lögreglu.
Sem dæmi um að lögregla sé berskjölduð fyrir pólitísku valdi bendir Esposito á að raun heyri allir níu lögreglustjórar landsins sem og héraðssaksóknarar beint undir skipunarvald ráðherra, en ekki ríkislögreglustjóra og ríkissaksóknara. Þar að auki séu stjórnendur og almennir lögregluþjónar skipaðir til fimm ára í senn og því auðvelt að framlengja ekki ráðninguna án þess að ráðherra þurfi að skýra það.
GRECO mælir með að valdauppbygging lögreglunnar verði endurskoðuð til að minna afskipti ráðherra af lögreglu og að skerpa þurfi á hlutverki ríkislögreglustjóra.