Fréttamyndband frá BBC sem fjallar um hvernig Íslendingar hafa tekið á áfengisdrykku og fíkniefnaneyslu unglinga hefur deilt 17.152 sinnum þegar þetta er skrifað. Myndbandið er að finna hér á Facebook. Má segja að það fari eins og eldur um sinu.
Þarna er rætt meðal annars við Dag B. Eggertsson, fólk á foreldravakt og unglinga á Íslandi. Einnig eru birtar tölur um hvernig ástandið var áður – býsna slæmt segir í fréttinni – og hvernig það er nú, eitt hið besta á Vesturlöndum.
Það er mikið verk að fletta í gegnum ummæli um fréttina. Þau eru orðin meira en 1000 talsins. Þar má meðal annars lesa að Ísland sé stórkostleg þjóð, að aðrar þjóðir geti lært í þessu efni af Íslendingum, svo mælir þarna fólk sem hefur komið til Íslands eða langar að fara þangað.
Aðrir segja að það sé ekkert að marka þetta, Íslendingar séu svo fáir og þjóðin sé svo einsleit að það sé í raun enginn vandi að gera átak af þessu tagi. Svo eru líka þeir sem segja að við séum þrúgandi lúterskt samfélag og það sé ekkert eftirsóknarvert að líkjast okkur.
En margir eru semsé yfir sig hrifnir eins og sjá má hérna.