Stjórn Sambands ungra Framsóknarmanna hefur sent frá sér ályktun til stuðnings kjarabaráttu ljósmæðra. Í ályktuninni segir meðal annars að allir landsmenn njóti góðs af þeirri grunnþjónustu sem að ljósmæður
veita á einn eða annan hátt einhverntímann á lífsleiðinni og að starf þeirra skuli metið að verðleikum.
Þá kemur einnig fram að það sé stefna sambandsins að nemar skuli ávallt fá greitt þegar starfsnám er til jafns við hefðbundna vinnu og
ótækt að hjúkrunarfræðingar þurfi að taka á sig launalækkun við að bæta við sig ljósmæðranámi.
Sandra Rán Ásgrímsdóttir, formaður SUF, segir að það hafi verið
einhuga samþykki innan stjórnar SUF að sýna ljósmæðrum stuðning í
sinni kjarabaráttu:
„Það er okkar stefna að þær stéttir og þau störf í
samfélaginu sem að koma að umönnun og uppeldi séu metin til samræmis
við mikilvægi þeirra, ljósmæður eru ein af þessum stéttum,“
sagði Sandra Rán.
Ályktunina í heild sinni má lesa hér að neðan:
Stjórn Sambands ungra Framsóknarmanna styður heilshugar við
kjarabaráttu ljósmæðra. Ljósmæður eru elsta menntaða kvennastétt
landsins og sinna grunnþjónustu sem allir landsmenn njóta góðs af á
einn eða annan hátt einhverntímann á ævinni.
Ljósmæðranám er 6 ára háskólanám á Íslandi. Fyrst ljúka ljósmæður
hjúkrunarfræðinámi áður en þær fara í tveggja ára ljósmæðranám. Að því
loknu lækka þær í launum og í starfsnáminu eru þær launalausar.
Stefna Sambands ungra Framsóknarmanna er að nemar skuli ávalt fá
greiðslur í starfsnámi þar sem þeir þurfa að vinna hefðbundna vinnu og
að nemar séu tryggðir í störfum sínum. Starf ljósmæðra þarf að meta að
verðleikum og nauðsynlegt er að tryggja nýliðun í þessari mikilvægu
stétt.
Stjórn Sambands ungra Framsóknarmanna telur mikilvægt að hugað sé að
þeim stéttum sem koma að umönnun og uppeldi í samfélaginu og að störf
þeirra og ábyrgð séu metin til samræmis við mikilvægi þeirra. Því
hvetur stjórnin þess að nám og ábyrgð ljósmæðra verði metið að
verðleikum við samningagerð við stéttina.