Björn Valur Gíslason, fyrrum varaformaður VG, segir það gott mál að nú skuli greiðslur Alþingis til þingmanna verða gerðar opinberar, líkt og til stendur samkvæmt Steingrími J. Sigfússyni, forseta Alþingis. Hann telur einnig sjálfsagt að Alþingi endurgreiði útgjöld þingmanna, þeir eigi ekki að „verða fyrir útgjöldum vegna starfa sinna.“
Það sem er eftirtektavert er að Björn Valur sakar fyrrum kollega sína á þingi um vísvitandi sjálftöku á almannafé. Og ekki bara einn eða tvo, heldur marga:
„Það er líka gott og gilt að í framtíðinni verði greiðslur til þingmanna opinberar og rekjanlegar til einstaklinga. Það breytir því ekki að fram til þessa hafa margir þeirra farið vísvitandi á svig við reglur (svo ekki sé nú meira sagt) sem gilt hafa um þessi mál og dregið þannig til sín háar upphæðir. Fyrir mér eru endurgreiðslur vegna aksturs í einkaerindum eða styrkur vegna kostnaðar við heimilisrekstur, sem ekki er til staðar, á pari við að kaupa vörur í BYKO út á reikning Þjóðleikhússins og hirða þær svo sjálfur. Vonandi áttar þingið sig á því.“
Björn Valur nafngreinir engan í pistli sínum en innkaupaferðin í Byko er augljóslega tilvísun í mál Árna Johnsen, sem dæmdur var í tveggja ára fangelsi fyrir fjárdrátt og umboðssvik í opinberu starfi, mútuþægni og rangar skýrslur til yfirvalda.
Pistill Björns Vals:
Hvað svo ?
Þingmenn eiga að sjálfsögðu að fá útlagðan kostnað vegna starfs síns endurgreiddan. Þingið á að sjálfsögðu að sjá þingmönnum sem ekki búa á starfssvæði þingsins fyrir húsnæði. Þingmenn eiga ekki frekar en aðrir að verða fyrir útgjöldum vegna starfa sinna sem slíkir.
Það er líka gott og gilt að í framtíðinni verði greiðslur til þingmanna opinberar og rekjanlegar til einstaklinga. Það breytir því ekki að fram til þessa hafa margir þeirra farið vísvitandi á svig við reglur (svo ekki sé nú meira sagt) sem gilt hafa um þessi mál og dregið þannig til sín háar upphæðir. Fyrir mér eru endurgreiðslur vegna aksturs í einkaerindum eða styrkur vegna kostnaðar við heimilisrekstur, sem ekki er til staðar, á pari við að kaupa vörur í BYKO út á reikning Þjóðleikhússins og hirða þær svo sjálfur.
Vonandi áttar þingið sig á því.
