Kæri Óttar
Ég veit að gærdagurinn er kannski í móðu, eins og oft gerist þegar athyglin, fjörið og hitinn bera mann yfir miðjum aldri ofurliði. Allir geta misst sig aðeins í góðu geimi – og gjaldið er oft smá þynnka daginn eftir. En nú gekkstu of langt.

Um árabil hefurðu verið einhvers konar átoritet meðal þjóðarinnar þegar kemur að geðheilbrigði, geðsjúkdómum í sögulegu samhengi og meira að segja kynlífi. Stjórnendur LSH hafa falið þér það ægivald að skera úr um hvort einstaklingar eiga skilið að gangast undir kynleiðréttingu. Þú veist ýmislegt, enda menntaður geðlæknir, og ert mælskur og maður orðsins – við þökkum þér fyrir þau störf sem þú hefur unnið vel í þágu þjóðar og einstaklinga.
Nú þurfum við hins vegar að ræða aðeins saman um mörk og ábyrgð. Í gær sagðir þú þetta í síðdegisútvarpi Rásar 2:

„Það sem einkennir konur í samskipti við netið er þessi trúgirni.“ […] „Að konurnar, þær eru að senda af sér nektarmyndir af brjóstum eða kynfærum til einhvers sem þær treysta — einhver elskhugi sem tekur myndina og svo þegar sambandið súrnar þá náttúrulega setur hann myndina á netið og þá er konan allt í einu orðin ægilegt fórnarlamb.“ […] „[Hún] hefur verið svikin og þvíumlíkt. En hún getur engum um kennt nema sjálfri sér því það bera allir ábyrgð á því sem þeir setja á netið sjálfir.”

Já, þú sagðir þetta allt. Það er nefnilega upptaka af þessu á netinu. Ég veit að það kann að virðast ótrúlegt – því fyrir þig var þetta kannski bara ósköp venjulegt samtal um eitthvað sem þú telur þig hafa sérþekkingu á. Trúðu mér – ég kannast vel við að vera fljót að tileinka mér hluti. Þú ert eflaust steinhissa á því að konur séu svona viðkvæmar daginn eftir eitthvað sem kann að virðast algjört smáatriði og prýðilegasta hrútskýring.

Til að hjálpa þér að átta þig betur á hvers vegna þú gerðir allt vitlaust með ummælunum hef ég ákveðið að taka saman lista með atriðum sem mér heyrist þurfa að árétta hjá þér. Þú getur prentað hann út og hengt á ísskápinn kannski:

• Þú ert ekki kona
• Konur og karlar eru jafnklár almennt séð (ég veit, þetta er skellur!)
• Konur eru mjög oft klárari í því sem þær varðar en karlar
• Konur eru ekki trúgjörn grey sem eiga erfitt með samskipti á netinu
• Það kallast stafrænt kynferðisofbeldi þegar efni kynferðislegs eðlis er sett á netið án samþykkis – úr kjötheimum kannast þú kannski við káf án samþykkis, kossa án samþykkis, og já ekki skulum við gleyma kynlífi án samþykkis sem kallast nauðgun
• Allir geta orðið fyrir stafrænu kynferðisofbeldi, líka gamlir hrútskýrendur
• Það er flestum körlum fjarri því náttúrulegt að beita stafrænu kynferðisofbeldi
• Sá sem fremur brot (í þessu tilfelli stafrænt kynferðsofbeldi) ber ALLA ábyrgðina

Ég veit að þú berð ekki ábyrgð á því að hafa verið fenginn í þennan þátt til að ræða málefni sem þú hefur lítið sem ekkert vit á. En mistökin eru nú til að læra af þeim. Óttar minn, viltu plís sækja þér smá þekkingu áður en þú kemur næst fram opinberlega með meiningar um konur eða kynferðisofbeldi. Það væri best fyrir alla.

Þú veist símann hjá mér,
Þín Ragga