Tveir meistaranemar í klínískri sálfræði í Háskólanum í Reykjavík, Eva Sjöfn Helgadóttir og Baldur Hannesson, hafa sett í gang spennandi verkefni sem tengist feðrum ungra barna og hugrænni atferlismeðferð, sem oftast er kölluð HAM. Blaðakona ákvað að heyra í þeim og kanna hvað þeim gengur til með uppátækinu.

„Við erum að rannsaka hvort að feður með börn á fyrsta aldursári sækist eftir því að koma í hópmeðferð og hvort að sú hópmeðferð sýni árangur. Við erum búin að vera með einn hóp og erum nú i næstu viku að fara af stað með annan hóp.“

Í pabbahópnum leggja Eva Sjöfn og Baldur upp með að kenna feðrum hugræna atferlismeðferð (HAM) sem reynst hefur vel til að takast á við ýmiskonar vanlíðan, eins og streitu, kvíða og depurð.

„Á námskeiðinu er farið yfir hvernig hugsanir okkar hafa áhrif á það hvernig okkur líður og hvernig við högum okkur, en ekki ytri atburðir. Kenndar verða ýmsar aðferðir til að endurskoða hugsanir okkar og ætlum við að skoða það út frá föðurhlutverkinu nú í fyrsta sinn.“

Þau skoða það hvernig hugsanir, hegðun og líðan tengjast og skoða leiðir til að breyta hugsunarhætti.

 „Námskeiðið sem við höfðum til hliðsjónar hefur áður verið notað, og er enn notað, á ýmsum stöðum en við höfum nú sniðið það sérstaklega að nýbökuðum feðrum. Ástæðan fyrir því að við völdum það að kynna námskeið fyrir feður er sú að okkur fannst mikil þörf vera fyrir það í samfélaginu. Auk þess langaði okkur að gera eitthvað nýtt og reyna að sýna fram á að þarft sé að huga að báðum foreldrum þegar þeir eignast barn. Feður upplifa sömu tilfinningar og mæður og er því mikilvægt að sinna þeirra líðan rétt eins og hjá mæðrum.“

Það er markmið námskeiðshaldaranna að þátttakendur læri nýjar aðferðir til að takast á við aðstæður og tilfinningar sem eru erfiðar.

„Þetta er ákveðin tækni til þess að eiga við óhjálplegar hugsanir og breyta hegðun sem að getur einnig verið óhjálpleg. HAM aðferðir geta nýst hverjum og einum við að skora á sjálfan sig, setja sér markmið og endurmeta hugsanir. Þetta eru einungis fimm tímar og það verður skemmtileg fræðsla í hverjum tíma með mismunandi áherslum. Það getur líka verið mjög gaman að hitta aðra feður, þeir hafa sumir deilt reynslu sinni og ráðlagt hver öðrum. Við vonum bara að þetta nýtist öllum þátttakendum á einn eða annan hátt.“

Ekki er gert ráð fyrir að krílin mæti með á námskeiðið en ef engin pössun er í boði eru þau meira en velkomin, að sögn Evu Sjafnar og Baldurs.
Þeir sem að hafa áhuga á að kynna sér námskeiðið og jafnvel taka þátt geta farið inn á síðuna www.facebook.com/pabbahopur eða sent Evu Sjöfn og Baldri tölvupóst á netfangið pabbahopur@gmail.com.