Birgir Örn Guðjónsson, áður þekktur sem Biggi lögga og nú flugþjónn skrifar á dag á Facebook síðu sinni einlægan pistil þar sem hann biðst afsökunar á hegðun sinni. Hann hafi brugðist landi og þjóð með afdrifaríkum hætti og vilji gera hreint fyrir sínum dyrum. Hann biður fólk um að fyrirgefa sér og dæma hann ekki þrátt fyrir allt sem á undan sé gengið.
Birgir hefur eins og flestir vita látið af störfum innan lögreglunnar og starfar nú sem flugþjónn hjá Icelandair. Þegar hann ákvað að skipta um starfsvettvang hafði Bleikt samband við hann og grennslaðist fyrir um ástæður þess að hann ákvað að söðla um með þessum hætti og þá sagði hann:
„Konan mín er kennari og ég var búinn að vera að reyna að fá hana til að hætta því láglaunastarfi og skella sér í flugið. Hún var eitthvað treg til þannig að ég ákvað þá að skella mér bara sjálfur. Lögreglustarfið er því miður þannig að maður er alltaf með augun opin fyrir nýjum tækifærum.“
Birgir sagði þá að hann myndi sakna lögreglustarfsmenn en hugsjónir dugi ekki til að reka heimili.
„Ég á samt örugglega eftir að verða ljómandi flugliði og ég hlakka mikið til að takast á við það. Kjörin í löggunni hafa líka orðið til þess að ég hef nánast ekkert náð að ferðast síðan ég byrjaði þar. Ég hef ekki farið með frúnni til útlanda síðan 2005. Það er frekar leiðinlegt, sérstaklega þegar maður elskar að ferðast. En svona er þetta. Nú fæ ég allavega að ferðast eitthvað sjálfur og vonandi líka með fjölskyldunni í náinni framtíð.“
En hvers vegna er Biggi að biðjast afsökunar? Sér hann kannski eftir því að hafa skipt um starfsvettvang eða gerði hann afdrifarík mistök í nýja starfinu?
Gefum Birgi orðið:
Kæru vinir, ég vil biðjast afsökunar á að hafa brugðist ykkur. Ég trúi ekki enn að þetta hafi gerst. Þetta er ófyrirgefanleg hegðun á allan hátt og alls ekki til eftirbreytni. Ég mun gera allt til að reyna bæta upp fyrir þessa hræðilegu yfirsýn mína. Ég bið ykkur um að dæma mig ekki og líta ekki á mig sem vonda manneskju. Ég ætla þrátt fyrir allt að reyna að líta björtum augum á framtíðina og jafna mig á þessu áfalli. Sem betur fer kemur nýr dagur eftir þennan dag og sem meira er, nýr öskudagur á næsta ári. Ég vil bara segja ykkur að ég er í alvöru gott foreldi þó svo að ég hafi gleymt að taka mynd af börnunum mínum í búning áður en þau fóru í skólann í morgun. Ég lofa.
