Lungnabólga af völdum örveru, sem nefnist berfrymingur (mycoplasma). Henni fylgir ekki eins hár hiti og hefðbundinni bakteríulungnabólgu og er því nefnd köld lungnabólga (afbrigðileg lungnabólga). Berfrymingasýkingu fylgir ekki alltaf lungnabólga.
![](http://www.dv.is/media/bleikt/2017/05/e42bf5560b-604x400-o-600x397.jpg)
Hver er orsökin?
Sýking af völdum berfryminga (mycoplasma), sem smitast á milli fólks með munnvatni og slími.
- Örveran berst þó aðeins á milli manna við náin samskipti. Þess vegna er algengt að hún berist á milli fjölskyldumeðlima, skólasystkina og vistmanna á stofnunum.
- Það er tilgangslaust að einangra smitaða einstaklinga því smitberar geta verið einkennalausir.
- Faraldur brýst út á u.þ.b. 3-5 ára fresti.
- Berfrymingasýking er algengust hjá þeim sem eru á aldrinum 5-20 ára og eru oftast væg einkenni.
Hver eru einkennin?
Meðgöngutími berfrymingasýkingar, þ.e. tíminn frá smiti þar til einkenni koma fram, er 2-3 vikur. Þau eru:
- höfuðverkur
- vöðvaverkir
- óþægindi í hálsi
- þurr hósti, sem getur varað í nokkrar vikur
- yfirleitt lágur hiti, en hár hiti útilokar ekki, að um kalda lungnabólgu sé að ræða
- uppgangur (slím) sem getur fylgt hóstanum, en hann er oftar einkenni hefðbundinnar bakteríulungnabólgu.
Hvernig greinir læknirinn sjúkdóminn?
- Greiningin byggist á sjúkrasögu og læknisskoðun. Læknirinn hlustar lungu sjúklingsins með hlustunarpípu en lungnahlustun á sjúklingi með berfrymingalungnabólgu getur verið eðlileg.
- Læknirinn getur tekið blóðsýni og leitað að mótefnum gegn berfrymingum.
- Röntgenmynd af lungum styður greininguna. Klínísk einkenni sjúklingsins eru oft ekki í samræmi við útbreiðslu lungnabólgunnar á myndinni, þ.e. mikilli lungnabólgu fylgja ekki endilega mikil einkenni og öfugt.
Batahorfur
Það er tiltölulega auðvelt að lækna afbrigðilega lungnabólgu. Hún hefur sjaldnast fylgikvilla í för með sér hjá annars heilbrigðum einstaklingi.
Hver er meðferðin?
Við kaldri lungnabólgu er gefið sýklalyf.