Eva Björk er söngkona og lagahöfundur. Hún hefur sungið og samið tónlist frá unga aldri og gaf út sitt fyrsta lag 17 ára. Boltinn fór fyrst að rúlla hjá henni þegar hún byrjaði í kór Lindakirkju hjá Óskari Einars árið 2011. Síðan þá hefur hún fengið mörg tækifæri til að vinna með frábærum listamönnum.
Eva hefur tekið að sér alls konar bakraddaverkefni eins og undankeppni Eurovision. Hún hefur einnig sungið bakraddir fyrir Kaleo, Glowie, Sylvíu, Kítón og Frostrósir. Hún tók þátt í tónleikauppsetningu Jesus Christ Superstar, bæði sem kórmeðlimur en einnig sem hluti af hópnum „Soul Girls.“
Árið 2013 stofnaði Eva Björk ásamt Rögnu Björg og Hrefnu Hrund sönghópinn Harmony. Þær hafa síðan þá haldið fjóra jólatónleika og komið fram við hin ýmsu tilefni. Á jólatónleikum Heru Bjarkar 2015 sáu þær um bakraddir en komu einnig fram sem gestasöngvarar. Harmony breyttist svo í Harmoníu þegar fjórir söngvarar bættust við hópinn jólin 2016.
Í fyrra sumar ákvað Eva að dusta rykið af píanóinu sínu og hefur æft sig að syngja og spila hvern einasta dag síðan. Hún gerði fallega ábreiðu af laginu „Lover, Please Stay“ eftir hljómsveitina Nothing But Thieves.
Horfðu á myndbandið hér fyrir neðan.
