„Ég held það sé kominn tími til að foreldrar taki smá ábyrgð og skoði nú það sem er í gangi í símanum og iPadinum hjá sínum börnum og hætti að segja „já mitt barn gerir ekki svona…,“
segir Lóreley Sigurjónsdóttir um hegðun barna og unglinga á samfélagsmiðlum. Lóreley fór inn á smáforritið Musical.ly hjá dóttur sinni eftir að hafa heyrt nokkur dæmi um ljót skilaboð og síður. Þar blasti við henni ógrynni af síðum og ljótum ummælum. Mörg ummæli voru á þá leið að börn eða unglingar voru að hvetja aðra til að taka eigið líf. Lóreley segist vera afar þakklát að börnin hennar hafa aldrei lent í svona neteinelti, en aðgangarnir sem um ræðir eru ekki í eigu barnanna hennar né um börnin hennar.
„Það erum við sem foreldrarnir sem berum ábyrgð á börnunum okkar og hvað þau eru að gera og nota. Held að það sé kominn tími til að fólk hætti að kaupa sér frið með endalausum ipod og símum og fari að ala krakkana upp eins og á að gera,“
segir Lóreley. Hún tjáði sig fyrst um málið á Facebook og birti með færslunni nokkrar myndir sem hún tók af ummælum og aðgöngum. Bleikt hafði samband við Lóreley og ræddi við hana um forritið, það sem finnst inni á því og hvað sé hægt að gera. Lóreley segist vona að foreldrar barna sem lenda í svona einelti haldi vel utan um þau og foreldrarnir sem eiga börnin sem leggja í svona einelti leita hjálpar fyrir sig og börnin sín. Hún bætir því við að krakkar í dag eru orðnir mikið klárari en foreldrar á símana og samfélagsmiðlana og geta oft auðveldlega falið notkun sína fyrir foreldrum. Eins og að búa til aðganga með gervi nöfnum og vera í símanum á næturnar.
