„Ég var búinn að vera með þessa plötu í hausnum á mér í meira en fimmtán ár. Það segir þér kannski ekki mikið en það var allt lagt í þessa plötu,“ segir Krummi Björgvinsson. „Það er engu sparað varðandi lagasmíði, textagerð, útsetningar, upptökur, hljóðblöndun og plötukápu.“
LEGEND er tvíeyki Krumma og Halldórs Á. Björnssonar. Þeir gáfu út sína fyrstu plötu Fearless árið 2012 á Íslandi við góðar undirtektir. Í kjölfarið gerði bandið samning við kanadíska plötufyrirtækið Artoffact Records sem gaf út plötuna á heimsvísu. Midnight Champion er önnur plata sveitarinnar og kom út á Artoffact 13. október og er einnig gefin út á heimsvísu. Trommarinn Frosti Jón Runófsson gekk til liðs við bandið árið 2013 og spilar á Midnight Champion. Live bandið samanstendur af Bjarna Sigurðarsyni á gítar (Mínus), Frosti Jón á trommur (Klink) og Hálfdán Árnasyni á bassa. LEGEND hefur verið iðin við það að spila erlendis síðan fyrsta platan kom út og hefur bandið eignast mjög sterkan og breiðan aðdáendahóp um allan heim og þá helst í Þýskalandi og Norður-Ameríku.
„Það eru tónleikaferðalög framundan hjá sveitinni að kynna plötuna. Stífar æfingar, sköpunargleði og sjálfviljugur skilningur á hvor öðrum,“ segir Krummi.
Tónlist LEGEND á nýju plötunni má flokka sem framsækið post metal/rokk með rafrænum hljóðheimi og hljóðgervlum. Það eru einnig líka smá áhrif frá Industrial (Nine Inch Nails, Ministry og fleirum) senunni frá áttatíu áratugnum og synthpop. Tónlistin er mjög dramatísk og þung.
LEGEND gaf nýverið út myndband við titilag plötunnar sem var frumsýnt á Revolver Magazine sem er eitt stærsta rokktímarit heims.
„Lagið og myndbandið fjallar um hvernig umhverfið spilar inn í drápshvötina okkar. Hvernig samfélag býr til morðingja með öllu þessu hatri, meinfýsi og illgirni í garð hvors annars. Hvernig langvarandi einelti getur brotist út í andstæðu sína þannig að eineltisfórnarlambið verður gerandi. Andúð og fordómar ala af sér uggvænlegar afleiðingar sem hafa ómæld áhrif á líf ótal einstaklinga,“ segir Krummi, en LEGEND mun halda útgáfutónleika snemma á næsta ári.
Midnight Champion má panta á bandcampsíðu LEGEND.
Midnight Champion er að fá fantagóða dóma, bæði hér heima og erlendis, hér má sjá ummæli Ragnars Bragasonar leikstjóra, Ólafar Erlu grafísks hönnuðar og eiganda Svart og Birgis Jónssonar trommara Dimmu.
