„Ógeðslega sætt að klára þetta. Við erum búnir að vera núna fjögur ár í úrslitakeppninni og náðum loksins að klára þetta núna,“ sagði Ellert Finnbogi Eiríksson, fyrirliði KH eftir 1-1 jafntefli liðsins gegn Kórdrengjum í kvöld.

Það var Eyþór Helgi Birgisson sem kom Kórdrengjunum yfir á 4 mínútu en Alexander Lúðvígsson jafnaði metin fyrir KH á 39 mínútu og lokatölur því 1-1. KH vann fyrri leikinn 1-0 og mun því leika í 3. deildinni næsta sumar.

„Þetta er búið að vera mjög gaman í sumar en auðvitað aðeins upp og niður. Við ætluðum að vinna riðilinn okkar en það tókst ekki en við unnum hérna í dag þannig að markmiðinu er náð.“

„Þetta var bara geðveiki þessi leikur. Mikil barátta og Kórdrengir eiga stórt hrós skilið, þeir mættu hérna og voru geggjaðir en heilt yfir þá fannst mér við eiga þetta skilið.“

Viðtalið í heild sinni má sjá hér fyrir ofan og neðan.