Bjarni Helgason skrifar frá Shkodër:

„Ég er mjög ánægður með þessi þrjú stig í kvöld“ sagði Ragnar Sigurðsson, varnarmaður íslenska landsliðsins eftir 2-1 sigur liðsins gegn Kosóvó í kvöld.

Það voru þeir Björn Bergmann Sigurðarson og Gylfi Þór Sigurðsson sem skoruðu mörk Íslands í leiknum en Atdhe Nuhiu skoraði mark heimamanna í leiknum.

Ísland er því komið í vænlega stöðu á nýjan leik en liðið er í öðru sæti riðilsins með 10 stig, þremur stigum minna en Króatar sem unnu Úkraínu 1-0 í kvöld.

„Við gerðum bara það sem að þurfti að gera. Við getum ekki alltaf gert þetta fallega. Það sýnir bara styrk að klára svona leik og það er líka langt síðan að við spiluðum saman. Auðvitað vill maður gera þetta fallega stundum en þrjú stig eru þrjú stig.“

„Boltinn fór í höndina á mér en það hefði verið harður dómur að dæma hendi á þetta fannst mér. Það var erfitt að eiga við framherjann þeirra. Hann var stór og sterkur og góður í að nota líkamann en það skapaðist aldrei nein hætta í kringum hann þannig.“

Viðtalið í heild sinni má sjá hér fyrir ofan og neðan.