N1 og KSÍ hafa endurnýjað samstarfssamning sinn sem fyrst var undirritaður árið 2014 og gildir endurnýjunin til þriggja ára. Um er að ræða stærsta samstarfssamning N1 en hann felur í sér að N1 verði áfram einn helsti bakhjarl KSÍ.

„Við erum mjög ánægð með að endurnýja samstarfsamning okkar við N1. Þetta hefur verið mjög farsælt og kraftmikið samstarf og N1 hefur tekið virkan þátt með okkur í uppbyggingarstarfi íslenskrar knattspyrnu, meðal annars með því að fylkja sér á bak við Hæfileikamótun KSÍ. Við sjáum fram á spennandi tíma á komandi árum og ætlum okkur að efla samstarfið enn frekar til heilla fyrir íslenskan fótbolta,” segir Guðni Bergsson, formaður KSÍ.

„Samningur okkar við KSÍ snertir grunngildi N1 þar sem áhersla okkar í þessu samstarfi hefur ætíð verið á grasrótina þar sem Hæfileikamótun er í aðalhlutverki. Að geta aukið áhuga yngri iðkenda af báðum kynjum og hjálpa til við uppbyggingu knattspyrnu um land allt er okkur mikið kappsmál og samstarfið við KSÍ er lykilatriði þar. Við viljum byggja til framtíðar og við viljum aðstoða við að finna landsliðsmenn – og konur komandi kynslóða,“ segir Eggert Þór Kristófersson, forstjóri N1.

Hæfileikamótun elur einmitt í sér að knattspyrnulið um land allt fá heimsóknir frá þjálfurum KSÍ og meta þeir getu leikmanna á aldrinum 13 – 14 ára og fylgjast vel með efnilegum leikmönnum hvar sem þá er að finna á landinu.

Það voru þeir Eggert Þór Kristófersson, forstjóri N1 og Guðni Bergsson, formaður KSÍ, sem undirrituðu samstarfssamninginn meðan á úrtaksæfingu fyrir U17 stóð yfir í Kórnum í Kópavogi, en meðfylgjandi mynd var tekin við það tækifæri.