Joey Barton er enginn aðdáandi Jurgen Klopp, stjóra Liverpool og hefur verið afar duglegur að láta hann heyra það í gegnum tíðina.

Barton kallaði hann klappstýru á dögunum og sagði að það eina sem hann væri góður í væri að hvetja leikmenn sína áfram á hliðarlínunni.

Liverpool tapaði illa fyrir WBA í enska FA-bikarnum um helgina, 2-3 og eru úr leik í bikarnum en liðið fékk á sig þrjú ódýr mörk í fyrri hálfleik.

„Hann þarf að láta rannsaka sig, það er eitthvað mikið að þessum manni. Það er ekkert plan B hjá honum. Hann er það þrjóskur að ef að plan A virkar ekki, þá heldur hann bara áfram með plan A,“ sagði Barton.

„Van Dijk er góður leikmaður en ef þú varst að sjá hann í fyrsta skiptið í vörninni á laugardaginn þá leit hann skelfilega út. Þú gætir sett hvaða varnarmann sem er í heiminum þarna inn og hann myndi lenda í veseni.“

„Þeir héldu ekki stöðu gegn WBA og hugarfar leikmannanna var ömurlegt. Tíu skot á markið og níu mörk og þetta á að vera frábær stjóri og þjálfari. Þegar Liverpool sækir eins og þeir gera stundum þá eru þeir óstöðvandi.“

„Þeir munu hins vegar aldrei vinna neitt á meðan þeir verjast eins og þeir gera. Þeir voru hrein hörmung gegn WBA. Þeir sakna Coutinho, varnarleikurinn er afleitur og maður er farinn að halda að þetta lið muni aldrei vinna neitt undir stjórn Klopp,“ sagði hann að lokum.