Antonio Conte, stjóri Chelsea hefur svarað Jose Mourinho, stjóra Manchester United fullum hálsi.

Stjórarnir hafa verið að skiptast á orðum að undanförnu en Mourinho gagnrýndi þá Jurgen Klopp og Conte fyrir að haga sér eins og trúðar á hliðarlínunni.

Conte svaraði honum og sagði að Mourinho hefði ekki verið neitt skárri á sínum tíma og í gær skaut Mourinho fast á Conte og sagði að hann yrði allavega aldrei dæmdur fyrir veðmálasvindl.

„Þegar markmiðið þitt er að móðga alltaf næsta mann, þá ertu ekki stór maður, þá ertu lítill maður,“ sagði Conte eftir leik Chelsea og Norwich í kvöld.

„Þetta kemur mér ekki á óvart, svona hefur hann alltaf verið,“ sagði stjórinn að lokum.