Arsenal tók á móti Chelsea í stórleik ensku úrvalsdeildarinnar í kvöld en leiknum lauk með 2-2 jafntefli.

Jack Wilshere kom Arsenal yfir á 67. mínútu en Eden Hazard jafnaði metin fyrir gestina, fjórum mínútum síðar með marki úr vítaspyrnu.

Marcos Alonso kom Chelsea svo yfir á 84. mínútu áður en Hector Bellerin jafnaði metin fyrir heimamenn í uppbótartíma og lokatölur því 2-2.

Antonio Conte, stjóri Chelsea var mjög svekktur með að taka ekki öll þrjú stigin úr leiknum.

„Þetta er svekkjandi því við fengum ótrúlega mörg færi til þess að skora og áttum að vinna þennan leik. Í staðinn er ég hér að tala um jafntefli gegn góðu liði. Mér fannst við samt eiga skilið að vinna í kvöld,“ sagði Conte.

„Þegar að þú færð svona mörg dauðafæri þá áttu að vinna en við vinnum saman sem lið, töpum sem lið og gerum jafntefli sem lið. Morata fékk fín færi en hann var mjög óheppinn, stundum er það þannig og hann þarf að halda áfram að leggja hart að sér.“

„Það er mikilvægt fyrir framherja að skora og hann fékk góð færi í kvöld en svona er þetta. Ég er ánægður með hans framlag, hann barðist allan leikinn og vann vel fyrir liðið,“ sagði stjórinn að lokum.