Gerard Pique, varnarmaður Barcelona segist standa í miklli þakkarskuld við Sir Alex Ferguson, fyrrum stjóra Manchester United.

Pique spilaði með United á árunum 2004-2008 en snéri aftur til Barcelona árið 2008 þar sem að hann er uppalinn.

Hjá Barcelona hefur hann unnið allt sem hægt er að vinna sem knattspyrnumaður og líka með spænska landsliðinu en hann segir að Ferguson eigi stóran þátt í velgengni sinni.

„Ef ég horfi tilbaka þá hef ég unnið allt sem hægt er að vinna, bæði með Barcelona og Spáni. Hins vegar var ég í miklum vandræðum fyrir tíu árim síðan og líf mitt hefði getað farið í aðra átt ef ekki væri fyrir Sir Alex Ferguson,“ sagði Pique.

„Hann kom alltaf mjög vel fram við mig og var í raun eins og annar faðir fyrir mig. Hann hafði alltaf trú á mér, þangað til ég gerði slæm mistök í deildarleik með Bolton. Hann hélt samt áfram að reyna stappa í mig stálinu en ég datt út úr liðinu.“

„Ég bað um að fá að fara til Barcelona og sagði honum í hreinskilni að ég vildi fara. Þetta var eitt erfiðasta samtal sem ég hef átt á ferlinum því hann hafði svo mikla trú á mér. Hann gerði það sem var best fyrir mig og leyfði mér fara. Hann þurfti ekki að gera það en ég mun ætíð vera honum þakklátur,“ sagði hann að lokum.