Manchester United tekur á móti Liverpool í stórleik ensku úrvalsdeildarinnar í dag klukkan 12:30 og eru byrjunarliðin klár.

Paul Pogba, miðjumaður Manchester United er ekki í hóp hjá liðinu í dag en enskir fjölmiðlar greina frá því að hann hafi meiðst á æfingu liðsins í gær.

Miðjumanninum tókst ekki að klára æfinguna og hann mætti ekki með liðsfélögum sínum á Lowry hótelið í gær fyrir leikinn mikilvæga.

Það verða þeir Nemanja Matic, Scott McTominay og Juan Mata sem munu spila á miðjunni hjá United gegn Liverpool í dag en byrjunarliðin voru tilkynnt núna rétt í þessu.

Manchester United er í öðru sæti deildarinnar með 62 stig, tveimur stigum meira en Liverpool sem er í þriðja sætinu og því ljóst að það verður hart barist á Old Trafford í dag.