Yfirvöld í Madrid brugðust strax við sjálfstæðisyfirlýsingu Katalóníumanna og lagði Mariano Rajoy, forsætisráðherra Spánar, fram þá tillögu að heimastjórn Katalóníu verði svipt völdum og að Katalóníuhérað lúti allri stjórn Spánar. Sú tillaga verður lögð fyrir efri deild spænska þingsins og er ekki búist við öðru en að hún verði samþykkt.

Rajoy hefur verið mjög harður í þeirri afstöðu sinni að Katalónía fái ekki sjálfstæði frá Spáni. Búist er við því að hann og aðrir ráðamenn hefji nú vinnu við að svipta heimastjórn Katalóníu völdum. Gera má ráð fyrir því að Carles Puigdemont, forseta heimastjórnar Katalóníu, verði vikið frá völdum þegar í stað.

Katalónska þingið samþykkti sjálfstæðisyfirlýsinguna með 70 atkvæðum gegn 10 í dag. Mikill fögnuður braust út meðal þeirra þingmanna sem barist hafa fyrir sjálfstæði. Þá söfnuðust þúsundir saman fyrir utan katalónska þingið þar sem ákvörðuninni var fagnað.

Ekki voru þó allir þingmenn Katalóníu fylgjandi þessari ákvörðun þingsins. Nokkrir þingmenn PSC, katalónska sósíalistaflokksins, gengu út áður en gengið var til atkvæðagreiðslu og sögðu þeir að atkvæðagreiðslan væri ólögleg.

Rajoy kallaði eftir því á Twitter að spænskur almenningur héldi ró sinni vegna málsins. Á endanum myndu lög og regla gera það að verkum að friður kæmist á í Katalóníu.