Leikarinn Tom Hiddleston hefur aldrei notið meiri vinsælda en nú. Þessi breski leikari hefur meðal annars leikið Loka í vinsælum myndum og lék F. Scott Fitzgerald í kvikmynd Woody Allen Midnight in Paris. Það var hins vegar eftir leik sinn í spennuþáttunum The Night Manager, sem BBC sýndi ekki alls fyrir löngu, að nafn hans varð á allra vörum í Bretlandi, svo rækilega slógu þættirnir í gegn. Frammistaða Hiddleston varð til þess að mjög er veðjað á að hann verði næsti James Bond, en hann hefur lýst yfir löngun til að taka að sér hlutverkið. Hiddleston er vel menntaður, lærði í Cambridge og kann sitthvað fyrir sér í grísku og latínu. Hann hefur hlotið lof fyrir sviðsleik sinn, ekki síður en kvikmyndaleik.

Taylor Swift Söngkonan sést hér með Grammy verðlaunagripi sína.

Hiddleston er mikið í fréttum þessa dagana vegna sambands hans við bandarísku söngkonuna Taylor Swift. Þau eru nýtt par og hafa ekki farið leynt með samband sitt. Ljósmyndarar elta þau á röndum þegar sést til þeirra saman. Nýlega kynnti Hiddleston söngkonuna fyrir móður sinni þannig að sambandið er greinilega alvarlegt.