„Þeir á danska blaðinu spurðu svo hvort ég vilji koma og hitta „Bossinn“ 20. júlí á Jótlandi. Þeir vilja borga allan kostnað til að setja punkt við þessa sögu,“ segir götulistamaðurinn JoJo, um viðtal við hann sem birtist í danska Ekstra Bladet á miðvikudag. Þar er rifjað upp sögufrægt atvik þegar JoJo spilaði með Bruce Springsteen á Strikinu í Kaupmannahöfn árið 1988.

Viðtalið var birt í tilefni tónleika Springsteen í dönsku höfuðborginni sama dag. Voru þá liðin 28 ár síðan JoJo, sem heitir Jón Magnússon, kallaði til bandarísku stórstjörnunnar á Strikinu og bauð honum að spila með sér. Tóku þeir þrjú lög saman eins og sjá má á Youtube en gömul upptaka af götutónleikum þeirra hefur nú fengið tæp 650 þúsund áhorf. Springsteen spilar í Horsens á Jótlandi 20. júlí næstkomandi.

„Ég sagðist vera opinn fyrir því að koma og að ef að hann væri í góðum gír þá væri ég tilbúinn til þess. Danirnir hafa verið duglegir við að rifja þetta upp þegar „Bossinn“ kemur og sjónvarpið sýnt myndir af þessu,“ segir JoJo.

„Ég setti smá húmor í þetta viðtal og benti á að hann hefði gleymt að skila gítarnöglinni minni og að ég myndi sækja hana seinna. Hann er nú líka húmoristi.“