Sigga Kling, er þekkt fyrir óvenju litríkan klæðaburð, ekki síður en spádómsgáfu sína. Hún biðlar nú til þjóðarinnar að hjálpa sér að finna forláta peysu sem týndist á dularfullan hátt fyrir ári.

„Þetta atvikaðist þannig að ég var að skemmta í gæsapartíi í mjög huggulegum bústað í Grímsnesi. Þegar ég var á heimleið uppgötvaði ég að peysan var ekki í bílnum. Ég hringdi í þessar góðu stúlkur og viti menn, peysan var á staðnum og lofuðu þær að koma henni í Hafnarfjörð eftir dvölina í Grímsnesi.“

Peysan, sem er eftir Írisi Eggertsdóttur fatahönnuð, virðist þó hafa horfið einhvers staðar á milli Grímsness og Hafnarfjarðar. „Mér kemur ekki til hugar að neinn hafi stolið henni af galdranorn eins og mér, frekar að hún hafi endað einhvers staðar alveg óvart. Kannski lenti hún á milli þilja í Grímsnesinu, og kannski inni í geymslu hjá einhverjum í Hafnarfirði. Því miður er ég ekki nógu góð spákona til að sjá nákvæmlega hvar hún er. Það er að minnsta kosti enginn að nota hana, til þess er hún allt of áberandi.“

Síðan peysan týndist hafa engar vísbendingar borist um niðurlög hennar. Þrátt fyrir að Sigga hafi, ásamt velviljuðum vinum, stofnað facebook-hópinn „Dularfulla peysumálið“. „Það getur verið að þeim sem óvart tók peysuna hafi líka fundist þetta orðið of vandræðalegt, þar sem búið var að stofna facebook hóp. En mér þætti svo vænt um að fá peysuna til baka, hún er einn fárra veraldlegra hluta í eigu minni sem ég ber tilfinningar til. Líklega er það vegna þess að mér þykir svo vænt um hana Írisi sem bjó hana til. Ef ég endurheimti peysuna verð ég svo glöð að ég mun halda sérstakan peysudag.“

Eins og sést á myndinni er peysan í öllum regnbogans litum og hekluð úr lopa. Hafi lesendur upplýsingar um hana eru þeir beðnir að hringja í Siggu Kling í síma 8990889. Sigga býður fundarlaun og gott karma, þeim sem kann að leysa þetta dularfulla mál.