Bandaríska leikkonan Ellizabeth McGovern lék lafði Coru Grantham í Downton Abbey við miklar vinsældir. Leikkonan er 54 ára og hefur í tíu ár verið söngkona í rokkhljómsveitinni Sadie and the Hotheads. Hljómsveitin vakti framan af litla athygli en þegar leikkonan tók að sér hlutverk lafði Coru í Downton Abbey fór áhugi á hljómsveitinni að vakna. Nú er plata á leiðinni.

Leikkonan er að leika á sviði í London, nánar tiltekið í leikritinu Sunset at the Villa Thalia sem gerist á Grikklandi skömmu fyrir valdarán hersins. McGovern er einnig að vinna að handriti ásamt Julian Fellowes, sem er höfundur Downton Abbey. Sagan sem þau vinna að fjallar um eina af stjörnum þöglu myndanna, Louise Brooks.

Mc Govern var á sínum yngri árum trúlofuð Sean Penn í stuttan tíma. Hún hefur í tuttugu ár verið gift breska leikstjóranum Simon Curtis. Þau búa í Bretlandi og eiga tvær dætur.

Þess má geta að leikarinn Hugh Bonneville, sem lék eiginmann hennar, Grantham lávarð, í Downton Abbey lék nýlega á sviði og fór með aðalhlutverkið í Þjóðníðingi Ibsens. Gagnrýnendur hafa hlaðið hann lofi fyrir frammistöðu hans.