Frétt uppfærð
Sinead O’Connor er komin fram og er heil á húfi, að sögn lögreglu

Ekkert hefur spurst til írsku söngkonunnar Sinead O’Connor síðan í gærmorgun. Lögregla hefur lýst eftir henni og óttast er um velferð hennar.

Að því er TMZ greinir frá fór Sinead O’Connor út að hjóla í gærmorgun í Wilmette í úthverfi Chicago-borgar í Bandaríkjunum. Hún er sögð hafa farið út klukkan sex að morgni en klukkan eitt eftir hádegi var lögregla látin vita að hún hefði ekki skilað sér heim.

Í yfirlýsingu sem lögreglan í Wilmette sendi frá sér í dag kemur fram að lögregla óski eftir upplýsingum frá þeim sem kunna að vita um ferðir söngkonunnar.

Aðstandendur Sinead O’Connor eru sagðir hafa haft áhyggjur af heilsu hennar og mun hún hafa verið í sjálfsvígshugleiðingum. Í nóvember í fyrra birti hún færslu á Facebook þar sem hún kvaðst hafa tekið of stóran skammt af lyfjum. Fyrr í þessum mánuði virtist hún hins vegar við góða heilsu og tilkynnti hún áhangendum sínum að hún hygðist vinna í sjálfboðastarfi fyrir góðgerðarstofnun í Chicago.

Það var svo í gærmorgun, eða skömmu áður en síðast sást til hennar, að hún birti færslu á Facebook-síðu sinni þar sem hún virtist gagnrýna son sinn, Jake, 28 ára, vegna forræðisdeilu sem hún hefur staðið í vegna þriggja annarra barna sinna.

Sinead O’Connor var í hópi vinsælustu tónlistarmanna heims á níunda og tíunda áratug liðinnar aldar en sló rækilega í gegn með laginu Nothing Compares 2 U. Lagið samdi tónlistarmaðurinn Prince sem féll frá í aprílmánuði.

[youtube https://www.youtube.com/watch?v=-ZCiHsIfrOg&w=560&h=315]