Gamla brýnið úr Rolling Stones, hinn sjötugi Ronnie Wood, er hamingjusamlega kvæntur hinni 39 ára gömlu Sally Humphreys. Á dögunum sagði Wood í viðtali við The Guardian að sér þætti nauðsynlegt að stunda kynlíf einu sinni á dag. Wood er sex barna faðir og hann og Humphreys eiga saman eins og hálfs árs gamla tvíbura, Alice Rose og Gracie Jane, sem hinn stolti faðir segir að syngi öllum stundum.

Wood segist vera á ákaflega góðum stað í lífi sínu. Fyrr á þessu ári gekkst hann undir uppskurð þar sem krabbameinsæxli var fjarlægt. Hann fer reglulega í læknisskoðun. Það sem hann vill helst gera í lífinu, fyrir utan að stunda kynlíf náttúrlega, er að vera í fríi á Bahamaeyjum með eiginkonunni og tvíburunum.

Wood og Humphreys gengu í hjónaband árið 2012 en hún er þriðja eiginkona hans. Hún segir hann vera skemmtilegan, góðan og blíðan mann. „Ég vildi að aldursmunurinn væri ekki þarna en hann er það. Það var annaðhvort að segja: Ég get ekki staðið í þessu vegna aldursmunarins eða taka þessu eins og það er. Á árum áður hugsaði aldrei um að fara á stefnumót með manni sem væri tvisvar sinnum eldri en ég, en það er einmitt það sem gerðist.“