Henrý Steinn, 19 ára gamall transmaður, eignaðist fyrir fjórum vikum stúlku sem hann er nú með á brjósti. Henrý og móðir hans, Jónína Baldursdóttir, eru í viðtali í nýjasta tölublaði Akureyri vikublaðs.. Þau vilja opna umræðuna um málefni transfólks.

DV greindi frá málinu fyrir skemmstu. Þar kom fram að fæðingin hafði tekið 26 klukkustundir, allt hefði þó gengið vel og stúlkan verið heilbrigð sem er mest um vert.

Sjá nánar: Íslenskur karlmaður fæddi dóttur: Fæðingin tók 26 klukkustundir – „Þetta er æðislegt“

Að sögn mæðginanna er fjölskyldan stór og er dóttir Henrýs, tíunda barnabarn Jónínu. Þá segist Henrý hafa kynnst kærasta sínum og barnsföður á hinseginn fundum og sagði þá hafa verið þá einu sem höfðu verið einhleypir í bústaðaferðum og ákveðið að gera eitthvað í því. Henrý segist ekki vera samkynhneigður, heldur sé hann hinseginn.

„Mér er alveg sama hvað er á milli lappanna á fólki,“ sagði hann og benti á að ekki væri samasemmerki á milli þess að vera sambandi með einstaklingi af sama kyni og að vera hommi.

Móðir Henrýs segir hann hafa upplifað mikla vanlíðan í sjöunda bekk. Þá hafi hann verið byrjaður að skera sig og þau hafi leitað til sálfræðinga, en án árangurs. Jónína segist hafa upplifað mikinn létti þegar Henrý hafi sagt henni að hann upplifði sig sem strák.

„Þessu barni leið rosalega illa í mörg ár og var farið að skera sig til að deyfa sársaukan. Við höfðum talað við sálfræðinga og reynt ýmislegt án árangurs. Þegar hann sagði mér að sér liði meira eins og strákur upplifði ég létti. Loksins var eitthvað sem gat verið ástæða fyrir allri þessari vanlíðan. Ég hugsaði af hverju ekki? Mér datt ekki í hug að reyna að stoppa hann eða vera með skæting. Það eina sem ég vildi var að barninu mínu myndi líða betur,“ segir hún í viðtalinu.

Henrý segir það hafa verið mikil forréttindi að fá að ganga með barn. Hann er fyrsti íslenski transmaðurinn til að verða ófrískur eftir að kynleiðréttingarferli var hafið. Hann segir fóstureyðingu aldrei hafa verið möguleika.

Lestu viðtalið við Henrý Stein í heild sinni í Akureyri vikublaði.