„Eins og komið hefur fram í fréttum hefur skírnum farið nokkuð fækkandi undanfarin ár. Kemur þar margt til en ýmsum þykir of mikið tilstand fylgja athöfninni og jafnvel of mikill kostnaður. Af því tilefni býður Breiðholtskirkju upp á svokallaðann Drop-in skírnardag í kirkjunni, laugardaginn 28. maí næstkomandi frá 13.00-16.00,“ þetta segir séra Þórhallur Heimisson sem einnig ætlar að bjóða upp á ókeypis giftingar í júnímánuði.

Þórhallur segir:

„Það verður hægt að koma til skírnar í þessari fallegu og nýtískulegu kirkju með litlum fyrirvara, sjálfur eða með barnið sitt, – og allt ókeypis. Í framhaldinu verður síðan boðið upp á drop -in brúðkaupsdag með sama sniði laugardaginn 11. júní frá 13.00 -16.00.“

Þá geta pör fengið ókeypis hjónavígslu með fallegri tónlist og söng en presturinn bendir á að mörgum vex í augum kostnaður við brúðkaup. Breiðholtskirkja vill gefa öllum tækifæri til að ganga í hjónaband sér að kostnaðarlausu við fallega athöfn og eftirminnilega.

Sr. Þórhallur Heimisson, sóknarprestur Breiðholtskirkju annast allar athafnir beggja dagana. Við rathafnirnar leikur Örn Magnússon, organisti kirkjunnar, undir söng og sönghópur syngur sálma.

Þórhallur segir:

„Ekki þarf að bóka hvorki skírn né brúðkaup en gott er að láta vita með einhverjum fyrirvara svo enginn þurfi að bíða. Hægt er að hafa samband í síma sóknarprests, 8917562. Sé skírnarbarn yngra en 16 ára þarf skriflegt samþykki beggja ábyrgðarmanna barns. Auk þess þurfa foreldrar að koma með fæðingarvottorð. Vígsluþegar þurfa einnig á vottorðum að halda svo vígslan sé lögleg og eru því beðin að hafa samband með fyrirvara svo hægt sé að koma pappírsvinnunni frá. “

Við þetta bætir Þórhallur að allir séu velkomnir.