Ef Mark Wahlberg gæti tekið eina ákvörðun frá leiklistarferli sínum til baka þá væri hann líklega ekki í neinum vandræðum með að velja.

Wahlberg sló sem kunnugt er í gegn í myndinni Boogie Nights þar sem hann fór með hlutverk klámmyndaleikarans Dirk Diggler. Myndin, sem kom út árið 1997, hlaut einróma lof gagnrýnenda en sjálfur segist Wahlberg sjá eftir því að hafa leikið í myndinni.

Wahlberg, sem er kaþólskur, sagði viðtali við Chicago Tribune á dögunum að hann vonaði að Guð fyrirgæfi honum vegna leiks hans í myndinni. Viðurkenndi hann að hafa í nokkur skipti ekki vandað nógu vel til verka þegar hann valdi sér hlutverk og nefndi hann sérstaklega hlutverkið í Boogie Nights í því samhengi.

Í myndinni er fylgst með risi og falli Dirks Digglers í klámmyndabransanum í Bandaríkjunum á áttunda og níunda áratug liðinnar aldar.

Wahlberg hefur oft tjáð sig um trúarlíf sitt og hélt hann til dæmis boð fyrir Frans páfa þegar páfinn heimsótti Bandaríkin árið 2015. Þá nefndi Wahlberg, í gríni, hvort Frans myndi fyrirgefa honum vegna leiks hans í myndinni Ted.