Verkstæði Gullkistunnar hefur verið starfrækt síðan árið 1870 en þá var það verkstæði Erlendar Magnússonar gullsmiðs til ársins 1909. Núverandi eigandi skartgripaverslunarinnar Gullkistunnar, Dóra Jónsdóttir, tók við fyrirtækinu árið 1970 af föður sínum Jóni Dalmannsyni gullsmiði sem átti verslunina og verkstæðið í 40 ár.
Fyrirtækið hefur alltaf boðið upp á fjölbreytt úrval af þjóðbúningasilfri og unnið er meðal annars eftir gömlum munstrum, sem Erlendur Magnússon hafði safnað og mótin sem gerð voru fyrir sandsteypu fylgdu verkstæðinu. Enn er farið eftir þessum gömlu munstrum, en gömlu mótin eru nú komin í varðveislu í Árbæjarsafni.
„Skartgripir úr silfri eru bæði sérhannaðir og einnig er unnið eftir gömlum munstrum,“ segir Dóra. „Þjóðbúningasilfur er mjög fjölbreytt og geta viðskiptavinir fengið silfur eftir mörgum gömlum munstrum og einnig mjög fjölbreyttu handunnu víravirki. Ef fólk á gamla erfðagripi er hægt að lagfæra þá, hreinsa og gylla eftir þörfum. Hægt er að fá til viðbótar í ýmsum gömlum munstrum, ef eitthvað vantar,“ bætir Dóra við.
Verslunin er staðsett á Frakkastíg 10 og er opið alla virka daga frá kl. 14:00 til 18:00 og laugardaga frá kl. 11:00 til 14:00. Hægt er að nálgast frekari upplýsingar um verslunina á heimasíðu hennar thjodbuningasilfur.is/.
