Bíl var ekið í gegnum mannþröng á hátíð sem haldin er árlega af Filippseyingum um víða veröld með þeim afleiðingum að ellefu létust og fjölmargir særðust.
Pilturinn, Andy Le, ákvað að fara ekki á hátíðina þar sem hann þurfti að sinna heimanáminu sínu þetta kvöld. Þess í stað fóru foreldrar hans á hátíðina með fimm ára systur Andy og urðu þau öll fyrir bifreiðinni og létust af sárum sínum. Stúlkan, Katie Le, var að útskrifast úr leikskóla og átti að byrja í barnaskóla í haust.
Skömmu áður en harmleikurinn reið yfir fékk Andy SMS frá föður sínum sem tjáði honum að þau væru bráðlega að fara að leggja af stað heim.
Söfnun hefur verið hrundið af stað fyrir Andy á vefnum GoFundMe og hafa nú þegar tæplega 500 þúsund kanadískir dollarar safnast, eða rúmar 44 milljónir króna. Munu peningarnir fara í að greiða fyrir útfararkostnað og styðja við bakið á Andy í framtíðinni.
Maðurinn sem ók bifreiðinni, hinn þrítugi Kai-Ji Adam Lo, hefur verið ákærður vegna málsins.
