„Hættulegustu einstaklingar í lífi íslenskra kvenna eru hvítir íslenskir karlar sem þær treysta. Makar, vinir, eiginmenn og fyrrverandi makar. Við breytum ekki þeirri staðreynd með því að senda þá með fyrstu vél… ég veit ekki hvert. Ekki frekar en að senda brúna kynferðisbrotamenn upp í flugvél,“ sagði hann í færslu á samfélagsmiðlum.
Þorsteinn birti færsluna í kjölfar umræðu um hópnauðganir þar sem gerendur eru erlendir karlmenn. Undanfarið hefur verið fjallað um þrjá menn sem eru til rannsóknar hjá lögreglunni á höfuðborgarsvæðinu, grunaðir um tvær hópnauðganir.
Um helgina fór saga á mikið flug um meinta hópnauðgun á sextán ára stúlku yfir páskana. Málið vakti hörð viðbrögð og mikla athygli, en síðan kom í ljós að sagan ætti ekki við rök að styðjast. Bylgja Hrönn Baldursdóttir, aðstoðaryfirlögregluþjónn hjá kynferðisbrotadeildinni, sagði í samtali við fréttastofu RÚV að það væri ekkert slíkt mál til rannsóknar hjá lögreglu og að þeim hafi ekki borist nein tilkynning um slíkt brot.
Sjá einnig: Meint hópnauðgun á 16 ára stúlku hvorki á borði lögreglu né Landspítala
„Nú fljúga myndbönd og skjáskot frá „hugrökkum“ ungum mönnum sem vilja senda tiltekið fólk frá Íslandi „með fyrstu vél heim.“ Kveikjan virðist vera hópnauðganir sem erlendir menn frömdu á skipulagðan hátt. Hryllingur sem ég fordæmi, eins og allt ofbeldi, en það eru viðbrögð ungra íslenskra manna sem ég staldra við,“ segir Þorsteinn.
„Gerendurnir eru erlendir og mögulega flóttamenn og mögulega í glæpagengi. Skiptir ekki. En hvers vegna hafa þessir ungu „hugrökku“ menn svona mikinn áhuga á þessum gerendum? Hvað með þá staðreynd að hættulegustu karlar í lífum íslenskra kvenna eru hvítir íslenskir karlar? Hvert á að senda þá með fyrstu vél?
Þú getur ekki falið rasismann, karlrembuna og þjóðernishyggjuna á bakvið umhyggju gagnvart konum sem var nauðgað. Ykkur er drull um kynbundið ofbeldi og efist örugglega um tengsl skaðlegra karlmennskuhugmynda við ofbeldi. Því annars væri búið að sjást og heyrast til ykkar áður.
Sjálfhverfan, rasisminn og fordómarnir er skaðlega karlmennskan sem ég hef verið að benda á í áratug. Þessir ungu „hugrökku“ menn eru illa haldnir af karlmennskuhugmyndum sem hafa leitt okkur í einhvers konar drullupoll ótta og óreiðu. Bara ef þeir gætu staldrað við, litið inn á við og séð samhengi hlutanna.“
„Allir (MEINTU MEINTU) ofbeldismennirnir sem voru til umfjöllunar í öllum fjölmiðlum, voru rannskakaðir, kærðir og jafnvel ákærðir eru langflestir mættir allir aftur. Drullu hressir og komnir með allt sitt aftur. Þætti, samstarf, góðar stöður og MEINTU brotin þeirra eru bara á sakaskrá „woke-fasista sem hata karla“.
Við búum í einhverri ótrúlegri þversögn með konur í öllum helstu valdastöðum og best í heimi í jafnrétti en elskum karla sem hata konur og útlendinga. Og við elskum að koma gerendum undan ábyrgð af því við meikum ekki að verða hugsanlega mögulega óvinsæl eða missa gigg eða tækifæri eða eitthvað. Fokking sérplægni, sérhagsmunarúnk og meðvirkni er að skapa kjöraðstæður fyrir fasískan hægri flokk og öfga-verk einhvers hvíts sjomla sem telur konur stjórna öllu.“
