Maður hefur verið ákærður fyrir stórfellda líkamsárás og stórfellt brot í nánu sambandi.

Ákært er vegna atburða sem urðu í heimahúsi sunnudaginn 5. nóvember árið 2023. Ákærði er sagður hafa ráðist með ofbeldi og hótunum gegn fyrrverandi sambýliskonu sinni og barnsmóður, í barnaherbergi, eldhúsi og þvottahúsi á þáverandi heimili hennar.

Hann hafi rifið hana upp úr rúmi í barnaherbergi og hrint henni á sófa sem þar var. Hann hafi dregið hana eftir gólfinu fram í eldhús, sparkað ítrekað í hana, meðal annars í andlit. Hann hafi síðan hrint henni svo hún féll aftur fyrir sig á þurrkara í þvottahúsinu, öskrað á hana, ógnað henni ítekað með hníf og hótað henni lífláti. Þrýsti hann hnífnum meðal annars að kvið hennar og hótaði því að „klára þetta“.

Hann ýtti syni þeirra sem varð vitni að árásinni ítrekað úr úr eldhúsinu og þvottahúsinu þegar drengurinn reyndi að stöðva árásina.

Konan hlaut ýmsa áverka af árásinni, mest bólgur, mar og eymsli. Segir í ákæru að ákærði hafi ógnað lífi, heilsu og velferð konunnar og sonarins á alvarlegan hátt og hann hafi sýnt drengnum varnvirðandi háttsemi, yfirgang og ruddalegt athæfi.

Fyrir hönd konunnar er krafist fjögurra milljóna króna í miskabætur og fyrir hönd drengsins tveggja milljóna króna.

Málið var þingfest fyrir Héraðsdómi Reykjaness síðastliðinn miðvikudag.