Maður að nafni Samuel Patrick Groft var nýlega handtekinn í borginni Los Angeles grunaður um alvarleg skemmdarverk á trjám. Er hann talinn vera einhvers konar trjáaraðmorðingi.

Lögreglan í Los Angeles tilkynnti um handtöku Groft á þriðjudag, 22. apríl. Hefur hann verið ákærður fyrir alvarleg skemmdarverk í miðborg Los Angeles, í Westlake héraði og Glassel Park. Er hann grunaður um að saga niður tré með keðjusög eins og segir í frétt People um málið.

Lögreglan hafði áður lýst eftir og varað við Groft og sagt að hann væri hættulegur. Ættu borgarar ekki að koma nálægt honum en láta lögreglu vita ef þeir sæju hann.

Groft er grunaður um að hafa sagað niður tré 17., 18., 19. og 22. apríl. Alls er talið að hann hafi sagað niður 11 tré. Tjónið er talið nema 347 þúsund dollurum, eða um 44,5 milljónum króna.

„Ég hef aldrei áður séð neinn ráðast á tré áður, sérstaklega ekki í kringum Jarðardaginn. Allir vildu vita hver gerði þetta og hvers vegna. Við vitum nú hver þetta var. Rannsóknin snýst um að komast að því hvers vegna hann gerði þetta,“ sagði Lilian Carranza, lögreglustjóri í Los Angeles á blaðamannafundi.

Lögreglan telur að fjöldamorðið á trjánum sé ekki einu glæpirnir sem Groft hafi framið. Rannsókn á óskyldum glæpum hans standa yfir.