Sagnfræðingurinn Anne Appelbaum, sem sérhæfir sig í sögu einræðisríkja í Evrópu, segist hafa verulegar áhyggjur af fyrstu vikum Donald Trump í embætti forseta Bandaríkjanna, öðru sinni, og segir að þeim svipi mjög til fyrstu skrefum einræðisstjórna fyrri tíma. Þetta kemur fram í viðtali við Appelbaum í hlaðvarpinu The Bulwark sem repúblikaninn Tim Miller stýrir. Miller, sem starfað hefur sem aðstoðarmaður og ráðgjafi, var einn af fyrstu repúblikönum sem snerust alfarið gegn Trump og stefnu hans þegar hann sóttist eftir embætti í fyrsta sinn.

Sagði Appelbaum sérstaklega hafa áhyggjur af brottvísunum frá Bandaríkjunum sem margar hverjar eru án dóms og laga. „Þetta er verulega óhugnalegt, jafnvel okkar versta fólk á skilið réttláta málsmeðferð,“ segir Appelbaum.

Mál fjölskylduföðursins Kilmar Abrego Garcia, frá Maryland, hefur vakið mikla athygli í Bandaríkjunum en honum virðist hafa verið ranglega vísað úr landi og hann fluttur í öryggisfangelsi í El Salvador. Bandarísk yfirvöld hafa harðneitað að snúa ákvörðuninni við og sækja Garcia og hefur sögusögnum um meint tengsl hans við undirheima verið dreift víða meðal stuðningsmanna ríkisstjórnar Trump.

Segir Appelbaum að þegar slíkar brottvísanir séu látnar standa og lög og reglur virtar að vettugi sé sífellt auðveldara að ganga lengra í geðþóttaákvörðunum og það sé verulegt áhyggjuefni.