Stór hópur barna, þjálfara og foreldra frá ÍA og UMFG eru strandaglópar á flugvellinum í Barcelona eftir að farþegavél Play var snúið við skömmu eftir brottför í gærkvöld vegna vélarbilunar. Svaf hópurinn á flugvellinum í nótt og eru strandarglóparnir í óvissu um hvað tekur við.

Í gærkvöld fengu farþegarnir 12 evrur hver fyrir mat og var sagt að flogið yrði kl. 12 í dag. Það mun hins vegar ekki standast. Miklum fjármunum hefur verið eytt í McDonalds og aðra skyndibita á flugvellinum enda um stóran hóp af svöngum og vansvefta ungmennum sem áttu að vera komin heim til Íslands fyrir löngu síðan.

„Ég er með óstaðfestar upplýsingar um að verið sé að vinna á málinu,“ segir móðir eins af ungu knattspyrnumönnunum, en hún er með í för. Segir hún að óvissa sé um framhaldið.

„Við fórum af stað kl. 11 í gærkvöld. Það lá fyrir held ég eiginlega um leið og við fórum í loftið að það væri einhver viðvörum þannig að við bara hringsóluðum með dekkin niðri í klukkutíma og lentum síðan aftur.“ Hún segir að upplifunin hafi ekki verið ógnvænleg og allir hafi verið rólegir.

Um 70 manna hópur frá ÍA var í æfingabúðum í Barcelona, 16 ára og yngri. Minni hópur keppti síðan á móti fyrir hönd UMFG frá Grindavík. Allt í allt eru þetta um 70 börn og síðan bætast við fararstjórar og þjálfarar, yfir 20 manns.

Birgir Olgeirsson, upplýsingafulltrúi hjá Play, segir í samtali við DV að verið sé að vinna í því að finna varahluti í flugvélina og er vonast til að flogið verði síðar í dag. Ekkert er þó staðfest í þeim efnum.

Móðir drengs í hópnum sem bíður heima eftir að hann komist í flug kvartar yfir slakri upplýsingagjöf Play í málinu. Algjör óvissa sé um heimferðina en verið er að kanna hvort hópurinn geti komist í annað flug heim. „Og Play gerir ekkrt,“ segir ósátt móðirin. Segir hún að misvísandi upplýsingar séu að berast um flug heim með Play, ýmist kl. 14, seinni partinn í dag eða í fyrramálið.

Uppfært kl. 13.49:
Samkvæmt upplýsingafulltrúa Play verður flogið frá Barcelona kl. 20.15 í kvöld.