Borist Johnson, fyrrverandi forsætisráðherra Bretlands og borgarstjóri London, varð fyrir árás strúts.

Fréttastofan Sky News greinir frá þessu.

Myndband náðist af atvikinu sem átti sér stað í safarí dýragarði í Texas fylki í Bandaríkjunum fyrir skemmstu. Deildi kona hans, Carrie, því á samfélagsmiðlum með yfirskriftinni: „Of fyndið til þess að deila ekki.“

Johnson sat með litlu barni í framsæti bílsins þegar strúturinn kom askvaðandi. Taldi Johnson sig vera öruggan en strúturinn réðst þá til atlögu og goggaði fast í forsætisráðherrann fyrrverandi.

„Ó Kristur,“ heyrðist Johnson góla en svo fylgdu blótsyrði sem voru svo ljót að það þurfti að setja hljóð yfir þau.

Johnson hrökklaðist úr embætti vorið 2023 eftir ýmsa skandala í Íhaldsflokknum og að hann hafði gerst sekur um sóttvarnarbrot. Síðan þá hefur hver leiðtogi á fætur öðrum hrökklast úr stólnum og ekki er útlitið gott fyrir núverandi formann, Kemi Badenoch. Er talið að Johnson geti hugsanlega snúið aftur í stólinn.