Íslensku Væb strákarnir sem taka þátt í Eurovision fyrir hönd Íslands eiga ekki mikla möguleika á að komast áfram upp úr undankeppni. Það er ef marka má veðbankana.

Tæpur mánuður er í Eurovision keppnina sem er að þessu sinni haldin í svissnesku borginni Basel. Hefst hún þriðjudaginn 13. maí og úrslitin eru laugardaginn 17. maí.

Af þeim 37 löndum sem taka þátt í keppninni er Ísland eins og stendur í 35. sæti hjá veðbönkum. Hefur lagið „Róa“ lítið hreyfst úr stað í þá tæpa tvo mánuði, eða frá því að Væb liðar unnu Söngvakeppnina og ljóst var að þeir myndu flytja framlag Íslands þetta árið.

Aðeins atriði Króatíu og Svartfjallalands eru talin ólíklegri til sigurs en íslenska atriðið. Sigurlíkurnar eru taldar vera innan við 1 prósent og talið ólíklegt að þessi lönd fari upp úr undankeppninni.

Svíþjóð er talið vera með sigurstranglegasta lagið að þessu sinni, „Bara bada bastu“ í flutningi KAJ. Sigurlíkur þess eru taldar 31 prósent. Önnur lönd sem eru ofarlega hjá veðbönkum eru Austurríki, Frakkland, Ísrael, Holland, Finnland og Belgía.