Dómur er fallinn í Héraðsdómi Reykjavíkur yfir Hauki Ægi Haukssyni, en hann var ákærður fyrir tilraun til manndráps vegna atviks fyrir utan heimili hans í mars árið 2023.
Haukur Ægir átti þar í átökum við sýrlenskan skutlara sem hafði áreitt kynferðislega dóttur kærustu Hauks, en skutlarinn ók stúlkunni að heimili Hauks. Haukur var með manninn í hálstaki er lögregla kom á vettvang en hann sagðist hafa brugðist við í sjálfsvörn við árás mannsins auk þess sem hann var að reyna að tryggja að lögreglan gæti handtekið manninn.
Sýrlendingurinn missti meðvitund í hálstakinu og var fluttur á bráðadeild.
„Ég er enginn engill en ég vil bara taka út refsingu fyrir það sem ég hef raunverulega gert af mér, ekki fyrir upplognar sakir og vitleysu,“ sagði Haukur í viðtali við DV um málið fyrr á árinu en hann telur ákæru gegn sér um tilraun til manndráps vera fráleita.
Dómur var kveðinn upp í málinu í Héraðsdómi Reykjavíkur um fjögurleytið í dag. Var Haukur sýknaður af ákæru um tilraun til manndráps en sakfelldur fyrir líkamsárás og hlýtur hann eins árs fangelsi.
Hann þarf auk þess að greiða sýrlenska skutlaranum og kynferðisbrotamanninum 500 þúsund krónur í miskabætur.
Í niðurstöðu dómsins er sagt að Haukur hafi borið fyrir sig neyðarvörn. Segir að þó að fallist sé á að brotaþolinn hafi barið hann með trépriki eftir að átök hófust að frumkvæði Hauks og kærustu hans þá hafi Haukur ekki sýnt fram á að hann hafi þurft að grípa til svo hættulegrar aðferðar við að halda brotaþola eins og raun ber vitni. Einnig segir að parið hafi átt þann kost að hringja í lögreglu í stað þess að standa í átökum við brotaþola.
Einnig er hafnað sjónarmiðum Hauks um borgaralega handtöku sem hann hafi framkvæmt á grunni þess að brotaþolinn var áður búinn að játa fyrir þeim kynferðisbrot gegn dóttur kærustu Hauks, því þau hafi haft mjög óljósar upplýsingar um brotið. Ekki sé hægt að réttlæta kyrkingartak með vísan til borgaralegrar handtöku.
Hins vegar er talið að Haukur hafi ekki haft ásetning um afleiðingar árásarinnar, þær að brotaþolinn missti meðvitund. Leiðir það til þess að hann er ekki sakfelldur fyrir tilraun til manndráps.
Í stuttu spjalli við DV segir Haukur að dómnum verði áfrýjað til Landsréttar. „Þetta er sturlun,“ segir hann og er afar ósáttur við niðurstöðuna. „Ég er virkilega ósáttur, ég átti aldrei að fá dóm fyrir neitt sem ég gerði þetta kvöld.“
Haukur bendir blaðamanni jafnframt á að Sýrlendingurinn hafi verið dæmdur í skilorðsbundið fangelsi fyrir að brjóta kynferðislega á stúlkunni og til að greiða henni 500 þúsund í miskabætur. Haukur hafi hins vegar verið að verjast Sýrlendingnum eftir að hann hafði slegið Hauk í höfuðið með priki og hann hafi verið að halda honum fyrir lögregluna. Það ætti að liggja fyrir að hann sé ekki glæpamaðurinn í þessu máli.
„Þetta er svo galið. Þeir líta til sakaferils míns þegar þeir dæma mig en þegar hann var dæmdur þá var ekki tekið tillit til þess að hann var á skilorði fyrir að hafa barið konu og börn,“ segir hann ennfremur og vísar til dómsins yfir sýrlenska skutlaranum sem í þessu máli var í hlutverki brotaþola.
