Donald Trump Bandaríkjaforseti hellti sér yfir blaðakonu CNN á mánudaginn eftir að hún bar upp spurningu um málefni Kilmar Abrego Garcia, sem fyrir mistök var brottvísað úr landi og sendur í fangelsi í El Salvador. Hæstiréttur Bandaríkjanna hefur úrskurðað að yfirvöldum beri að koma Garcia aftur heim, en ríkisstjórn Trump þverneitar að verða við því.
Blaðakonan, Kaitlan Collins, spurði hvers vegna ríkisstjórnin neitaði að fara eftir ákvörðun Hæstaréttar. „Þú sagðir sjálfur að ef hæstiréttur segði að ykkur bæri að sækja einhvern þá myndir þú verða við því,“ sagði Collins.
Trump varð ekki ánægður með spurninguna. Hann greip fram í fyrir blaðakonunni og sagðist ekkert þurfa að svara svona spurningu. „Hvers vegna segirðu ekki frekar: Það er dásamlegt að við séum að halda glæpamönnum frá landinu okkar?,“ sagði forsetinn pirraður og hélt áfram: „Þetta er ástæðan fyrir því að enginn horfir á ykkur lengur. Þið hafið engan trúverðugleika.“
Hæstiréttur var skýr í niðurstöðu sinni. Yfirvöldum bæri skylda til að koma því til leiðar að Garcia kæmist aftur heim til eiginkonu sinnar og barna, enda hefðu yfirvöld þegar viðurkennt að hann hafi verið sendur úr landi að tilefnislausu. Dómsmálaráðuneytið heldur því þó fram að Bandaríkin hafi engar valdheimildir í El Salvador og geti ekki skipað stjórnvöldum þar í landi að gera eitt né neitt. Forseti El Salvador, Nayib Bukele, segist ekki ætla að skipta sér af máli Garcia. „Hvernig get ég skilað honum til Bandaríkjanna? Á ég að smygla honum inn í landið? Auðvitað geri ég ekkert slíkt. Spurningin er galin. Við erum ekki hrifin af því að sleppa hryðjuverkamönnum úr haldi“
Collins: You said if The Supreme Court said if someone needed to be returned, you would abide by that
Trump: Why don’t you just say isn’t it wonderful that we’re keeping criminals out of our country? That’s why nobody watches you. pic.twitter.com/ti1z3pJiGW
— Acyn (@Acyn) April 14, 2025
Garcia var fyrir mistök sendur til El Salvador þrátt fyrir að hann hafi í Bandaríkjunum fengið alþjóðlega vernd auk loforðs um að vera aldrei sendur aftur til El Salvador eftir að hann flúði undan ofbeldi glæpahópa. Hann á eiginkonu og börn í Maryland og er með hreina sakaskrá og engin staðfest tengsl við glæpahópa í heimalandi sínu. Engu að síður heldur ríkisstjórn Trump því fram að hann sé glæpamaður. Eftir að hann var sendur úr landi hefur lítið til hans spurst en eftir að sögusagnir fóru að ganga um að hann væri látinn tilkynntu bandarísk stjórnvöld að hann væri á lífi og öruggur. Enginn hefur þó náð tali af honum síðan hann var sendur úr landi, svo vitað sé.
Líklegt þykir að hann sé í hinu alræmda CECOT-fangelsi sem hýsir einnig marga meðlimi úr glæpagenginu Barrio-18, sem Garcia flúði undan á sínum tíma. Móðir hans rak bakarí í bænum San Salvador og gekk reksturinn svo vel að gengið fór að beita fjölskylduna fjárkúgun. Til að tryggja greiðslur hótaði gengið að skaða Garcia, nauðga systur hans og myrða bróður hans, Cesar. Loks bauðst gengið til að hætta ofsóknum sínum ef Cesar gengi til liðs við þá. Fjölskyldan afþakkaði boðið. Dag einn ruddist gengið inn á heimili þeirra og hótaði að drepa Cesar. Allt þar til faðir þeirra reiddi fram mútufé. Fljótlega eftir þetta sendi fjölskyldan Cesar til Bandaríkjanna. Þá beindi gengið spjótum sínum gegn Garcia. Fjölskyldan reyndi að losna undan ofsóknunum með því að flytja á milli staða en gengið fann þau alltaf aftur. Þegar Garcia var 16 ára, árið 2011, sendi fjölskyldan hann til Bandaríkjanna þar sem hann hafði uppi á bróður sínum.
