Emile Smith Rowe færist nær því að yfirgefa Arsenal. Hann er á leið til Fulham samkvæmt helstu miðlum ytra.

Þessi 23 ára gamli leikmaður var ein af vonarstjörnum Arsenal fyrir ekki svo löngu síðan en hefur ekki verið inni í myndinni hjá Mikel Arteta undanfarin tímabil. Á síðustu leiktíð spilaði hann aðeins 346 mínútur í ensku úrvalsdeildinni.

Arsenal hafnaði 30 milljóna punda tilboði Fulham á dögunum en síðarnefnda félagið hefur nú lagt fram 35 milljóna punda tilboð, auk greiðslna síðar meir. Með þessu yrði Smith Rowe dýrasti leikmaður í sögu Fulham.

Smith Rowe er sem stendur með Arsenal í æfingaferð í Bandaríkjunum, en hann kom ekki við sögu í jafntefli liðsins gegn Bournemouth í nótt.

„Það eru hlutir að gerast á bak við tjöldin eins og er. Við ákváðum að það væri fyrir bestu að hann myndi ekki spila í dag,“ sagði Arteta um málið eftir leik.