Patrice Evra, goðsögn Manchester United, sá leik Sheffield United og Arsenal í ensku úrvalsdeildinni í gær. Hann var sérfræðingur Sky Sports um leikinn. Evra þekkir það vel að spila gegn Arsenal en hann gerði það margoft með United á sínum tíma.

Arsenal tapaði 1-0 gegn Sheffield í gær og segir Evra að það vanti alla karlmennsku í þetta lið. ,,Þetta kemur mér ekki á óvart með Arsenal. Ég kallaði þá börnin mín fyrir tíu árum og ég segi það ennþá í dag,“ sagði Evra.

,,Ég er ekki að sýna þeim óvirðingu, þetta er bara tilfinningin sem ég fæ. Þeir líta fallega og vel út en þeir líta ekki út fyrir að vera vinningslið.“

Granit Xhaka, fyrirliði Arsenal var spurður út í ummæli Evra. ,,Við verðum að hætta að tala um þetta kjaftæði, eins og hugarfar. Þetta er alltaf eins, hvort sem það sé á heima eða útivelli. Þú verður að vera stór karakter og ekki leita alltaf í sömu afsakanir,“ sagði Xhaka.

,,Mikið af fólki, talar allt of mikið. Þetta er ekki í fyrsta sinn sem Evra segir eitthvað um okkur. Ég ber mikla virðingu fyrir honum, hann var frábær leikmaður. Hann þarf samt að passa hvað hann segir, þetta er samt ekki bara hann. Mikið af fólki talar bara skít um okkur, þetta er alltaf eins.“

,,Það er oft furðulegt því oft eru þetta fyrrum leikmenn, sem voru í sömu stöðu. Í hverri viku tala þeir sama skítinn um okkur.“