„Þetta er sérstök tilfining, að spila góðan leik hérna og vinna sannfærandi sigur en vera samt hundfúll,“ sagði Þorsteinn Halldórsson, þjálfari Breiðabliks eftir 4-0 sigur liðsins á Grindavík í dag.

Það voru þær Ingibjörg Sigurðardóttir, Kristín Dís Árnadóttir, Rakel Hönnudóttir og Selma Sól Magnúsdóttir sem skoruðu mörk Blika í leiknum en sigur í dag hefði tryggt þeim Íslandsmeistaratitilinn ef Þór/KA hefði misstigið sig á Akureyri gegn FH.

„Við vissum alltaf hvað var að gerast á Akureyri en við létum stelpurnar reyndar ekkert vita af því. Það eina sem við vorum að hugsa um var bara að klára þennan leik og klára hann sannfærandi. Þór/KA stendur uppi sem sigurvegari og ég vil bara nota tækifærið og óska þeim til hamingju, þær eru vel að þessu komnar og áttu þetta skilið.“

„Við getum verið nokkuð ánægð með stelpurnar sem hafa tekið við keflinu í sumar. Við höfum ekki fengið á okkur mark síðan að Fanndís fór, hún er svo lélegur varnarmaður og við vinnum alla leiki sannfærandi þannig að við erum mjög ánægð með það hvernig við brugðumst við þessu brotthvarfi.“

Viðtalið í heild sinni má sjá hér fyrir ofan og neðan.