„Já ég neita því ekki að það gaf þessum sigri alveg auka kikk að fá að frétta það að Finnarnir skildu taka stig af Króötum,“ sagði Hannes Þór Halldórsson, leikmaður íslenska landsliðsins eftir 3-0 sigur liðsins á Tyrkjum í kvöld.
Það voru þeir Jóhann Berg Guðmundsson, Birkir Bjarnason og Kári Árnason sem skoruðu mörk Íslands í leiknum og er liðið nú á toppi I-riðils með 19 stig í efsta sætinu.
„Það er engin spurning um að þetta er einn af stærstu sigrum landsliðsins. Ef við horfum á allt sem var í húfi hérna og þennan útivöll sem er búið að tala mikið um og hversu erfitt vígi þetta væri.“
„Það var alveg yndislegt hvað leikplanið gekk 100% upp í dag. Að við myndum standa þéttir, halda þeim frá okkur fyrsta korterið. Það kom mér reyndar á óvart hvað þeir voru máttlitlir í byrjun en um leið og við skorum þá verða þeir vonlitlir og þegar að við finnum lyktina af þessu hérna þá göngum við bara á lagið og keyrum yfir þá.“
Viðtalið í heild sinni má sjá hér fyrir ofan og neðan.
