Freyr Alexandersson, þjálfari íslenska kvennalandsliðsins, var ánægður með stelpurnar í kvöld þrátt fyrir tap gegn Frökkum í fyrsta leik.
Ísland spilaði mjög góðan leik í kvöld þrátt fyrir tap og var spilamennska liðsins mjög jákvæð.
,,Núna er ég að berjast við það að halda einbeitingunni á jákvæðu hlutunum. Öll íslenska þjóðin er svekkt með þessa stóru ákvörðun sem réði úrslitum í dag,“ sagði Freyr.
,,Við fengum þau tækifæri sem við töluðum um. Við fengum þrjá risastóra sénsa sem við eigum að klára og eigum að fá vítaspyrnu, ef þetta var vítaspyrna í seinni hálfleik.“
,,Ég er stoltur en samt svekktur. Stelpurnar eru þreyttar, svekktar og sárar en samt stoltar.“
,,Við verðum að leyfa þeim að flakka næstu tímana og svo ná fókus.“
Ísland tapaði leiknum á vítaspyrnu en Elín Metta Jensen var dæmd brotleg. Freyr var allt annað en sáttur.
,,Ég get sagt þér það að ef það er hægt að dæma á þetta þá þarftu að dæma 20 vítaspyrnur í leik. Ég vil ekki segja meira um þetta. Við viljum ekki að dómararnir ráði úrslitum í leikjum.“
,,Hún er ekki skúrkurinn. Það kemur ekki til greina, ég skal frekar vera skúrkurinn. Þetta er bara bull, dómarinn sem dæmdi þetta víti. Það er ekki hægt að dæma víti á þetta, þetta er rugl og Elín Metta ber enga ábyrgð á þessu.“
