Heimir Hallgrímsson landsliðsþjálfari Íslands hefur valið leikmannahóp sinn fyrir leikinn mikilvæga gegn Króatíu í undankeppni HM.

Leikurinn fer fram 11. júní á Laugardalsvelli og ljóst má vera að mikið er undir enda getur Íslands náð Króatíu á toppi riðilsins með sigri.

Mesta athygli vekur að Viðar Örn Kjartansson framherji Maccabi tel Aviv er ekki í hópnum að þessu sinni.
Viðar byrjaði síðasta leik í undankeppni HM en kemst ekki í hóp núna.

,,Við erum búnir að ákveða hvað við ætlum að gera á þessum dögum, ég held að við hefðum ekki getað gert þetta á faglegri hátt en við gerðum. Margar ósvaraðar spurningar sem við þurftum að fá svar, við hefðum ekki getað gert þetta á faglegri hátt,“ sagði Heimir í samtali við 433.is

Ísland hefur þrisvar mætt Króatíu á síðustu árum, einum leik lauk með jafntefli en Ísland tapaði hinum tveimur.

,,Er ekki tími núna til að gera eitthvað, þetta er góður tími. Við reynum að læra af reynslunni, síðasti leikur var gott skref. Við töpum 2-0 en seinna markið kom í uppbótartíma, allan leikinn áttum við möguleika á að fá eitthvað úr þessum leik.“

,,Ég held að það fari enginn á nálum yfir því að við stillum þessu upp sem úrslitaleik, ef þessi leikur tapast þá er Króatía sex stigum fyrir framan okkur og góða markatölu. Það er ólíklegt að þeir tapi þremur leikjum af fjórum.“

Eins og fram kom valdi Heimir ekki Viðar Örn Kjartanson, Theodór Elmar Bjarnason eða Hólmar Örn Eyjólfsson í hópinn að þessu sinni.

,,Það eru leikmenn sem við settum í miðjulínuna sem geta spilað frammi, það er þeirra að bíta í það súra epli að vera ekki í hópnum núna.“