Framtíð Vinicius Junior hjá Real Madrid er sögð verða sífellt óljósari eftir að brasilíski sóknarmaðurinn hafnaði nýjasta samningstilboði félagsins.
Samkvæmt spænska miðlinum Cadena SER bauð Real Madrid Vinicius nýjan samning sem myndi færa honum rúmlega 360 þúsund pund í vikulaun. Leikmaðurinn vill hins vegar vera á sambærilegum kjörum og Kylian Mbappé, sem er sagður þéna um 500 þúsund pund á viku.
Vinicius á innan við ár eftir af núverandi samningi sínum og samkvæmt fréttunum er hann nú nær því að yfirgefa félagið en að skrifa undir framlengingu. Fram kemur að hann vilji ekki yfirgefa Real Madrid á frjálsri sölu næsta sumar og því gæti félagið neyðst til að selja hann ef samningar nást ekki.
Arsenal fylgist grannt með stöðunni og er Mikel Arteta sagður hafa Vinicius efstan á óskalista sínum yfir sóknarmenn. Lundúnafélagið er tilbúið að reyna að nýta sér stöðuna ef viðræðurnar fara endanlega út um þúfur.
Vinicius kom til Real Madrid árið 2018 og hefur síðan skorað 128 mörk í 376 leikjum fyrir félagið. Hann hefur verið einn af lykilmönnum liðsins undanfarin ár og því yrði brottför hans mikið áfall fyrir spænska stórveldið.
