Manchester United hyggst skoða möguleikann á að selja nafnaréttinn að nýjum heimavelli félagsins sem hluta af fjármögnun fyrirhugaðs 100 þúsund manna leikvangs við Old Trafford.
Framkvæmdastjóri verkefnisins, Collette Roche, sagði við kynningu á deiliskipulagi svæðisins að markmiðið væri að reka verkefnið af skynsemi.
„Þetta á að vera skynsemisverkefni, ekki hégómaverkefni,“ sagði Roche og staðfesti að félagið myndi skoða sölu á nafnarétti leikvangsins, líkt og Arsenal og Manchester City hafa áður gert.
Áætlað er að nýi leikvangurinn kosti um tvo milljarða punda og rísi um 320 metra frá núverandi staðsetningu Old Trafford. Samhliða honum er fyrirhuguð 370 akra uppbygging sem gæti skapað allt að 48 þúsund störf og 15 þúsund ný heimili.
Roche sagði að engin endanleg ákvörðun hefði verið tekin um fjármögnun verkefnisins, en félagið skoði ýmsar leiðir, þar á meðal lán, nýtt hlutafé og aðkomu fjárfesta.
Hún lagði áherslu á að tekjur af nafnaréttinum gætu hjálpað til við að halda miðaverði í skefjum.
„Það er mikilvægt fyrir okkur að halda miðaverði aðgengilegu. Til þess þurfum við að skapa tekjur annars staðar,“ sagði hún.
