Íslenska kvennalandsliðið tók á móti Sviss í Þjóðadeildinni í dag. Það var spilað á heimavelli Þróttar í Laugardalnum.

Fyrri hálfleikur var afar slakur hjá íslenska liðinu og það var Geraldine Reuteler sem kom gestunum yfir strax í upphafi leiks og Smilla Vallotti tvöfaldaði forskotið eftir að vörn Íslands hafði verið sundurspiluð.

Karólína Lea Vilhjálmsdóttir minnkaði hins vegar muninn með marki úr aukaspyrnu rétt fyrir lok fyrri hálfleiks. Óhætt er að segja að markvörður Sviss hefði átt að gera betur í markinu, líkt og sjá má hér neðar.

Snemma í seinni hálfleik skoraði Áslaug Munda Gunnlaugsdóttir afar slysalegt sjálfsmark og forysta Sviss orðin tvö mörk á ný.

Þá var hins vegar komið að Karólínu sem skoraði tvö mörk með skömmu millibili, fullkomnaði þrennuna og jafnaði fyrir Ísland.

Þegar um 20 mínútur voru eftir fékk Reuteler sitt annað gula spjald fyrir dýfu og þar með rautt. Rest leiksins var heilt yfir eign Íslands sem tókst þó ekki að nýta sér liðsmuninn til að finna sigurmarkið. Lokatölur 3-3.

Ísland er með 3 stig í þriðja og næstneðsta sæti riðilsins en Sviss er á botninum með stigi minna. Frakkar eru svo með 9 stig og Noregur 4 í riðli Íslands, en leikur þeirra liða stendur nú yfir.