Það vakti athygli fyrir nokkrum árum þegar brasilíski knattspyrnumaðurinn Hulk sleit sambandi við eiginkonu sína til margra ára og byrjaði með frænku hennar.

Hulk leikur í dag með Atletico Mineiro í heimalandinu en þessi 38 ára gamli leikmaður hefur á ferlinum makað krókinn í Rússlandi og Kína.

Árið 2019 hætti hann með Iran Angelo. Höfðu þau verið saman í meira en áratug og eiga saman þrjú börn.

Það liðu aðeins nokkrir mánuðir þar til hann var farinn að slá sér upp með Camila Angelo, náfrænku Iran.

Iran opnaði sig um það á sínum tíma að þetta hafi sært hana mjög. „Ég vakna og sofna á hverjum degi og skil ekki hvernig þetta gerðist. Ég er særð, stundum held ég að hjarta mitt sé að rifna. Hún var eins og dóttir mín,“ sagði hún.

Iran kvaðst einnig hafa haldið frænku sinni uppi í mörg ár með gjöfum og fjárframlögum. „Ég gaf henni allt, frá því að hún kom í heiminn. Ég fórnaði draumum mínum til að að láta hennar drauma rætast.“

Ef þetta var ekki nóg þá átti Hulk þarna eftir að barna Camila og eiga þau nú eitt barn saman.

Fyrr á þessu ári kom svo rúsínan í pylsuendanum þegar Hulk og Camila giftu sig.